Тоолу кӱндер кайра чӱмдӱ бичик кепке базар «Алтын-Туу» байзыҥ-јурт балдарга солун сый эдип, јарлу алтай бичиичи, кӧчӱреечи Иван Петрович Кочеевтиҥ (1912-1996) «Шулмузак» ла «Агаш аразыныҥ јуруктары» деп куучындарын орус тилле кепке базып чыгарды.
И.П. Кочеев Ада-Тӧрӧл учун Улу јууныҥ туружаачызы болгон. Совет-јопон јууда туружып, кайучылдардыҥ каруулу керегин башкарган. Јууныҥ кийнинде узак јылдарга областьтыҥ радиокомитединде иштеген.
Иван Петрович балдарга учурлап, кӧп повестьтер, куучындар, чӧрчӧктӧр бичиген. Ол айландыра јӱрӱмди, анчадала ар-бӱткенди, аҥ-куштарды балдардыҥ кӧзиле кӧрӱп, оныҥ чӱмдегени оогош болчомдорго јилбилӱ, јарт ла ачылталу болзын деп, јаан амадулу иштеген. Темдектезе, ол ло «Шулмузак» («Резвунья») деп куучынды алалы. Ондо тийиҥдердиҥ бир билезиниҥ јӱрӱми чӱмделген. Балдар оны соныркап кычырары быжу!