
«Алтын-Туу» бичик басма Лазарь Кокышевтиҥ «Мечин Јылдыс» деп романын такыптаҥ кепке јазады.
Романныҥ баштапкы ла jолдыктарынаҥ ала Лазарь Кокышев jиит Совет ороонныҥ jашӧскӱриминиҥ ичкери ырысту ла jарык јӱрӱмге jӱткӱгенин jедимдӱ кӧргӱскен. Рабфакты божоткон jииттер Алтайдыҥ ичиле jол-jорукка атанып, кажы ла конорго токтогон jеринде текшиjондык ла телекейде политикалык айалга керегинде лекциялар кычырып, Чуйдыҥ трагыла Акташка jеткендер. Оноҥ ары Улаганда jол jазаар ишке де болужып, Кату-Јарыкты ажып, Балыкчы jуртка келген. Мынаҥ олор Алтын-Кӧллӧ jӱзӱп турган катерле Корбу деп учар сууны табарып, Артыбашка jеделе, ойто Ойрот-Турага эбирип келгендер. Романныҥ тӧс геройлоры– Лена ла Каран. Лена, иркит сӧӧктӱ кыс, ӱредӱчи болуп ыраак jуртка иштеп барарга белен, Каран дезе летчик болор кӱӱндӱ.
«…Кайкамчылу öйлöр…
Уулдар пиджактарыныҥ тöжинде «Ворошиловский адучы» деп значокторлу jÿретен, кыстар дезе кажы ла вечерге эмезе танцаларга Мэри Пикфорд деген киноартистканыҥ чачындый прическалу келгилейтен. Ол ӧйлӧрдӧ кажы ла уулчак ворошиловский адучы болорго амадайтан, кызычактар jажы jетпес те болзо, jӱзӱн-jӱӱр эп-сӱме тапкылап, комсомолго киргилейтен.
Олор телекей ӱстинде эҥ баштапкы социалистический ороонныҥ jиит граждандары болгон. Jÿрÿмниҥ jаражына кайкажып, ончо иштерде туружып, олор келетен öйдö эҥ ле уур, эҥ ле кату öйлöрди öдöтöнин сеспегендер.
Ол тушта jÿрÿм элбек, амаду бийик болгон…