Алтын Туу бичик басма Тамара Муканова–Мендошеваныҥ «Таҥ атты, кӱн чыкты, jакшы, jакшы» деп адалган бичигин кепке базып, оныҥ презентациязын ӧткӱрдилер.
«Бу бичик бӱткӱл бойы эл-јонноҥ алган јӧӧжӧ. Jаш тужымнаҥ баштап, бӱгӱнги кӱнге јетире алынган эрјине байлыгым. Салым болуп, Ӧрӧги турган Кудайым јакшынак јандыру, алкыш-быйан айдатан арга берди: ончо алган байлык јӧӧжӧни кӱр-кӧксиме томдоп, быжырып алып, кайра јетиретен кӱч берди, Кайракоон баш ол учун!
Бичикте тузаланган авторлордыҥ jуунтыларынаҥ алган ӱзӱктер ле оос јетирӱлер учун јаан алкыш-быйаным кӱндӱлӱ мӧҥкӱликтердиҥ кажызына ла, олордыҥ агару эземине баштанып: Караҥ Кошевке, Николай Баскаковко, Таисия Тощаковага, Иван Шодоевке, Биле Кокулевага, Владимир Кокулевке, Ольга Тезегешке, Аржан Адаровко, Валентина Муйтуевага, Майя Чочкинага, Гӱзел Элемовага, Лазарь Кокышевке, Кӱӱгей Телесовко!
Анайда ок кӱндӱлӱ јерлештерим: Николай Мендеш, Танытпас Акулова, Бектир Келюев, Ольга Ойноткинова, Мира Демчинова, Ольга Ерехонова, ыраак таладаҥ изӱ эзенимди слерге јетирип, јаан алкыш-быйанымды айдадым! Бу бичиктиҥ тискинин колыма туттыртып берген Эдуард Бабрашев ле Јыман Белековко јаан алкыш-быйаным!
Эки рецензенттер – Светлана Тюхтеневага ла Эльвира Чининага, баш редактор Татьяна Туденевага јаан алкыш-быйаным!
Бичиктиҥ кадарына јурук берген баркамга Акмира Муканга быйаным!
Аҥылу быйаным филолог Эльвира Чининага, кире бажалыкта алтай кижиниҥ јаштоолош јаҥжыгузын элбеде јартап бергени учун»–БЫЙАНДУ СӦЗИН бичиктиҥ авторы Т.Н. Муканова-Мендошева jетирет.
Презентацияга jуулган улус бичикти бийик баалап режиссер-мультипликатор,
Казах кинематография биригӱниҥ турчызы, Г.И. Чорос-Гуркинниҥ адыла адалган јондык сыйдыҥ лауреады Тамара Николаевнага узаак jаш, бек су-кадык, jаҥы jайаан jедимдер кӱӱнзедилер.
